Napule nun t' 'o scurdà'

Napule nun t’ ‘o scurdà

O vintotto ‘e settembre d’ ‘o quarantrè

Se tignettere ‘e russe ‘e giesummine

For’ ‘e barcune  ‘e Materdei.

Uommene, femmene, viecchie,

guagliune ca sapevane ‘a storia malamente

e guagliune ca nun sapevane niente

sapettere ‘o stesse chelle c’ avevano  ‘a fà’

                       Napule nun t’ ‘o scurdà’

Ma qua chitarra e manduline?

O vintotto ‘e settembre d’ ‘o quarantrè

P’ ‘o Vommero e Pusilleco

P’ ‘e Funtanelle e ‘o Ponte ‘a Sanità

ll’accumpagnamento ‘o faceva ‘a mitraglia

e ‘o scugnizze cantave:

“ Jatevenne,

fetiente, carugnune. Jatevenne!

Strillave

Curreve

Sparave,

e mureva.

Mureva, senza sapè , p’’a libertà,

libertà senza discorse cumizie e bandiere

bisogne ‘e libertà d’ ‘a pecura e d’ ’o lupe,

bisogne ‘e libertà ‘e ll’omme

ca nun s’era avvelenate ancora

ca ‘na muntagna ‘e parole,

 semplicemente libertà.

                           Napule nun t’ ‘o scurdà

O vintotto ‘e settembre d’ ‘o quarantrè

‘o popele napultitane cumbatteve

Pe’ cancellà cient’anne

‘e lazzarune e lazzaronate

Francisciello e francischellate,

vermicielle,

tarantelle,

Pulicenella e Culumbrina,

festa forca e farina

e tutte ‘sti cazzate

ca ll’avevane  ‘nguajate.

‘o popole napultitane cumbatteve e mureva

Pe’ scrivere ‘nt’ ‘a storia finalmente

Quatte pagine tutte c’ ‘o stesse nomme:

 - " Dignità "….

                           Napule nun t’ ‘o scurdà.

Scritta dal Poeta  “ salvatore Palomba. “